وانا قاعد اونلاين كده وقع قدامى فيديو جميل اوى ل محمد على طالع بيتكلم فيه مع قناه الجزيره على حاجه مضحكه اوى بجد انا انبهرت و ممكن اصنف الفيديو ده على اساس انه محتواه كوميدى طالع بيقول ايه بقى انه وهو بيتكلم مع ابراهيم منير النائب العام لمرشد جماعه الاخوان المسلمين كانوا فى مكالمه مطوله مع بعض و ان محمد على بيقول لابراهيم منير انتوا عايزين ايه كاخوان ؟! هل عايزين تمسكوا البلد ؟ رد ابراهيم منير و قال ايه ده مين اللى فهمك كده ؟ ده بعد الوفاه سقطت وانتهت الشرعيه ؟! و الشرعيه رجعت للشعب ؟ و كمل بقى محمد على انه الكلام ده فى منتهى الجمال و ان الحاجه اللى كان الشعب خايف منها ان الاخوان يرجعوا هى مش هتحصل !!!
يا ولا … بجد يا ولا … لا بجد بجد يا ولا …. ده على اساس منطق بص العصفوره ولا ايه ده ؟
ده على اساس ان ده محصلش فى 2011 قالك مش هنترشح و اول ناس اترشحوا ؟ ده على اساس ان هو ده اللى بيحصل فى كل البلاد العربيه و مش بمزاجهم ده غصب عنهم و الحدق يفهم …
بس اللى باهرنى فى الموضوع وش محمد على و هو بيتكلم و قد ايه بيحاول يبان انه مصدق الكلام اللى بيقولوه مع ان وشه بيقول عكس كده تماما ….
نيجى لهشام عبدالله بقى بيعمل حاجه حلوه فى فيديوهاته …. يشغل موسيقى مؤثره علشان المشاهد يتاثر و يجيبلك مشاهد متعرفش جايبها منين و متصوره فين .. و فى انهى بلد ؟ مع انى عارف بس هو بقى يفضل مشغل الفيديوهات دى طول الحلقه و فى الاخر يقولك كلمتين بعد الفيديو و يعمل نفسه بيدمع علشان انت كمشاهد تتاثر … بس عايز اقولك ان انت ممثل و ممكن تعمل ده عادى و ده بالاضافه الى ان كلامك مش متركب على بعضه
اما بقى غاده نجيب ليها فيديو بنفسها طالعه تقول انا اختلافى مع النظام اختلاف انسانى و اخلاقى ؟! طيب انا عايز اعرف ده باماره ايه ؟ ده كل الدول حواليكى بيقروا و بيعترفوا بمدى الاستقرار اللى احنا فيه دلوقتى لما انتوا مشيتوا …. وانتى عارفه ده كويس بس يالا اهو كلام بتقوليه علشان طالعه على الهوا … اما بقى بخصوص الانسانيه و الاخلاقيه اللى جماعه الاخوان فيها ف حدث ولا حرج … مش قادر اقولك كميه الاخلاق و الانسانيه و الصدق و النزاهه اللى بيتم تصويرها و احنا عارفين و انتوا عارفين و الدنيا عارفه انكوا كلكوا بتمثلوا و برضه الشعب مش بيضحك عليه بكلمتين .. و لا ايه بقى يعجبنى انك تطلعى تتكلمى فى الشان العام على الهوا فى التلفيزيون … قلتيلى انتى مؤهلك ايه اصلا علشان تطلعى تتكلمى فى الشان العام و لا علشان اصلا الناس تسمعلك
وشوش عرفناهم و حفظناهم و كل يوم بيطلعوا يقولوا نفس الكلام .. وهتلاقى ان فيه تضارب بعد ما المفروض كلهم بيدافعوا عن نفس الحاجه و المفروض انهم فى نفس الجبهة.
على سبيل المثال انه عمرو عبد الهادى هو سياسى طالع علينا و يدينا من فتاويه فى الاراء السياسيه … لاء و ايه كاتب فى صفحته على السوشيال ميديا انه غير مسئول عن صحه الخبر و لكنه مسئول فقط عن تحليله … يعنى انا عايز اسالك لما انت غير مسئول عن صحه الخبر طالع كل شويه تنتقد و تقولنا فى اخبار انت متعرفش صحتها ليه ؟!! دى حاجه غريبه اوى ولا الادهى من كده انه كاتب ده علنا وصراحه على صفحته الشخصيه يعنى مثلا مش مكسوف ….. طيب دى اول حاجه تانى حاجه انك جاى تنتقد و تقول كل حاجه بيعملها النظام انها حاجه مش كويسه للشعب … طيب قولى انت عملت ايه ؟! او النظام اللى انت بتسانده عمل ايه دى تانى حاجه .. طيب ياترى ثالث حاجه ايه هى انه جاى يقول على المونوريل انه مشروع الاداره المصريه بتضحك فيه على الشعب على اساس ايه بقى ؟! اسمع التحليل الخاص ب السياسى اللى المفروض هو بيحلل الخبر … ايه بقى انه المونوريل هيخلى المسافه من العاشر للقاهره يبقى 45 دقيقه هو بقى بيقول ان من العاشر من رمضان الى القاهره نصف ساعه …. ياسلام بجد على تحليلاتك الرائعه طيب ماهو يا محلل يا سياسى لو كان الموضوع كده مكانش هيبقى ليه لازمه المونوريل بس انت علشان مش عارف تقول ايه و معندكش حاجه تقولها طالع بتقول اى حاجه و عايز اقولك ان المسافه بتاخد وقت اكتر من كده بكتير ده انت لو فى العاشر و بتحسبها لوسط البلد اللى هى رمسيس بقعد على الاقل ساعه و لو من العاشر من رمضان ل 6 اكتوبر بتاخد حوالى ساعتين ونص كمان !!!! … لكن هقول لمين انت ولا عايش معانا ولا تعرف عننا اى حاجه ولكن بتتكلم و خلاص …. و من اكثر الحاجات المضحكه فى الناس اللى بيساندوا الاخوان دول ان ربنا بيوقعهم فى بعض يعنى هو هو عمرو عبد الهادى ده طلع فى فيديو بيتكلم على الناس زمايله اللى فى القنوات اللى بيقبضوا كتير و بيتصرف عليهم ملايين !! ايوه زى مابقولك كده ده هو اللى قال و ممكن تشوف الفيديو على اليوتيوب و طالع بيقول ان الستاند اللى ماسك بيه الموبايل تمنه حاجه بسيطه و قال ايه ان فيه ناس منهم بيلبسوا هدوم مستعمله فى حين ان فيه زمايل ليهم بيتصرف عليهم فلوس كتير اوى …
طيب مستنينى اصدقك بعد كل ده !!!
نيجى بقى لوليد شرابى ده واحد و مش هقول على منصبه اللى كان بيشغله هنا فى مصر لان منصبه المفروض يكون ارقى من اللى هو بيعمله ده (المفروض انه المتحدث باسم قضاه من اجل مصر) والمفروض ان سمعه القضاه دى اشرف و انزه من اللى هو بيعمله الصراحه ولاتمت ليه بصله و مش كده و بس … وليد شرابى ده المدير الاقليمى لمنظمه هيومان رايتس مونيتور منظمه موجه لحقوق الانسان وطبعا احنا عارفين ان حقوق الانسان دلوقتى هو كارت الدول الخارجيه بتستخدمه للتدخل فى شئون الدول الاخرى وخصوصا التوقيت اللى احنا فيه ده … مع العلم ان فيه اختراقات فى حقوق الانسان من جانب الكيان الصهيونى بس ولا كان فى اى حاجه بتحصل مسمعناش وليد شرابى بيقول حاجه على اللى بيحصل هناك او فى سوريا بس ماشى ماهو ده المتوقع و معروف انت موجود فى المنظمه دى ليه و هدفك ايه منها …
نيجى بقى لسليم عزوز و هو صحفى مناهض للحكومه المصريه و الاداره المصريه بشكل عام و مش فى حاجه واحده لا … ده بينتقض كل حاجه طيب خش كده اتفرج على الفيديوهات بتاعه سليم عزوز فى الجزيره جايبين مظاهرات فى الجزيره و بيقولك فى حراك فى الشارع المصرى و المظاهرات موجوده فى المحافظات و الشوارع والازقه و اللى بيتظاهروا دول المئات من نبوع مصر !!! و لو استمر الوضع هيبقى الاف موجودين فى الشارع بيتظاهروا …. انا هرد عليك هقولك اسطوانه مشروخه شوفلك غيرها … من غير ما اقول ولا كلمه زياده …. ولا هضيع وقتى فى كلام اتهرس مليون مره.
صلاح بديوى بقى هو كاتب و صحفى بس برضه تابع للجزيره القطريه و تابع للاخوان بس بقى بينتقد الحكومه المصريه من وجهه نظر تانيه بقى … يعنى الاخوان بيعملوا ايه يجى واحد زى سليم عزوز يقولك فيه مظاهرات ضد الحكومه …. يجى مثلا واحد تانى زى عمرو عبد الهادى ينتقد المشروعات القوميه ويجيلنا بقى صلاح بديوى يقولك ايه بقى ينتقد من وجهه نظر تانيه … يقولك بقى ايه ان الاداره المصريه هى عميله للصهاينه … والله ده كلام يضحك …. انتوا لعبتكوا مفقوسه اوى ان كل صحفى ولا كاتب بينتقد فى حاجه شكل و بينتقد من جهه مختلفه علشان تكسبوا اكبر قدر من الشارع المصرى … واحد ينتقد المشروعات القوميه واحد تانى يقولك حقوق انسان واحد ثالث يقولك فى حراك فى الشراع المصرى وانت تقول الاداره المصريه بتكسب من الصهاينه … يابنى انت مدرك انت بتقول ايه ده اللى انت بتقولوه ده ميقولوش عيل فى سنه تانيه ابتدائى … بس لعبتكم مفقوسه اوى و باينه اوى و محدش هيصدقها و اكبر دليل على كده ان نسب المشاهده بتاعتكم مش بتاثر فى راى الشارع المصرى وهو ده اللى هيجننكم لانكم بيتصرفوا ملايين ومفيش اى حاجه بتحصل و عماليين تصرفوا ملايين و برضه الوضع هو هو … عارف ليه لان نيتكم سوده و مفضوحه و معندكوش غير الاسطوانه المشروخه اللى دايما تقولوها …
اخر حاجه يا صلاح يا بديوى عايز اقولهالك ان انتوا اللى اتعاملتوا مع الصهاينه وقت الثوره والبلد كلها عارفه كده و مش انا اللى بقول كده ده ايميلات هيلارى كلينتون هى اللى بتقول كده … يعنى الناس اللى اتعاملتوا معاهم هما اللى باعوكم .. وانتوا اللى اتعاملتوا مع الصهاينه و مش كده وبس ده معندكوش مشكله تتعاملوا معاهم تانى و كمان على حسب رؤيتى لسه هتتعاملوا معاهم ثالث.
