وقت ما تبقى مزنوق اعمل زى الاخوان بالظبط … يعنى ايه الكلام ده ؟!! اقولك انا يعنى ايه يعنى الاخوان مزنوقين و بقوا مكشوفين و مفيش حد طايقهم لدرجه عمرها ماحصلت قبل كده … ودليل على كلامى انهم ابتدوا يفكروا بره الصندوق … ايوه زى مابقولك كده …. اقولك ازاى.
زمان كانوا علشان يستدرجوا قلوب الناس اللى بيكلموهم كانوا بيكلموهم بالدين … بس وشهم اتكشف من بعد الثوره على طول و كل الناس حتى اللى كانوا متعاطفين معاهم عرفوا انهم كانوا لابسين الوش المتدين ده علشان يوصلوا للحكم … ف زى ماتقول الوش ده اتحرق خلاص يقوم الاخوان يعملوا ايه … يبتدوا يجندوا ناس من نوعيه تانيه خالص … زى مين بقى .. اقولك … زى اعلاميين, كتاب وصحفيين, بس برضه الوش ده اتحرق لان القنوات دى معروفه بالاسم و ممكن اقولك بيقولوا ايه كل يوم وهى هى نفس الاسطوانه المشروخه بتاعه الشرعية اللى شعب كله لفظها فى 30 يونيو و لسه هما مش مدركين او مدركين بس عاملين نفسهم مش واخدين بالهم …
ما علينا دى قصه تانيه خلينا فى القصه الاولى و هى ايه انهم القنوات بتاعتهم دى معروف بيعملوا فيها ايه و بيقولوا فيها ايه كل يوم من نفس الوشوش … لما الناس متجاوبتش معاهم و هى هى نفس نسبه المشاهده كل يوم … كده بقى فيه حاجه غلط نعمل ايه نعمل ايه … نجيب واحد نمطه جديد وشكله مختلف عن الاخوان و الكتاب و الصحفيين اللى تبعنا علشان يزود الشعبيه بتاعتنا على الارض … نجيب مين … نجيب مين … نجيب واحد اسمه تامر جمال (عطوه كنانه) او زى ما مسمى نفسه الجوكر المصرى … ياسلام واخدلى بالك من التعبير الجوكر المصرى يعنى مفيش حد زيه … بس نفسى اعرف مين اللى اختارلك الاسم لان اولا ده اكتر اسم يخلى الناس متثقش فيك ولا فى اللى انت بتقوله عارف يعنى ايه جوكر يعنى بيلعب على كل الاطراف و مش كده و بس بيلعب على مصلحته بس …
انت مين بقى ياعم الجوكر … ده دكتور نفسى و بيعمل فيديوهات على اساس انه بيوعى الناس توعيه سياسيه .. وبيقول على نفسه معالج سلوكى عن طريق الكوميديا الساخره … هتقولى ايه ده هو الناس بتتعالج عن طريق الكوميديا هقولك ياباشا ده كلام ناس كبار الناس الغلابه اللى زينا ميعرفهوش ..ز وده لعبه الاخوان الجديده اللى هى ايه انهم يجيبوا وش جديد مش نمطهم ولا شكلهم ويعمل فيديوهات من نوعيه عمرهم معملوها قبل كده علشان يكسبوا فئه جديده من الشعب فى صفهم … بس هقولك بقى على مفاجئه سلوكيه رهيبه و المفروض انك تكون عارفها باعتبارك معالك سلوكى يعنى ياعطوه ..
ان السلوك بتاع الشعب المصرى لحد دلوقتى بيبين كره وغضب ليكم (جماعه الاخوان المسلمين) ليه بقى لانه مستحمل كل الاصلاحات السياسيه اللى بتحصل و بيحمد ربنا على اليوم اللى الاخوان هربوا من البلد … وده كمان تحليل سلوكى لازم انت تبقى عارفه معناه ايه انك تهرب من البلد اللى هى المفروض بلدك ده كسلوك بيقولى انك عامل حاجه انت خايف منها و علشان كده بتهرب …
وحاجه كمان ياعطوه انت محتاج تتفرج على فيديوهاتك الساخره بعد ما تخلصها لانك واضح انك مش بتتفرج عليها لان اى بنى ادم ميقدرش يكمل الفيديوهات بتاعتك من كتر ماهى غير كوميديا الصراحه ولا وايه انت بتشر المحتوى بتاعك ده على اساس انه كوميديا ساخره …
