قبل ما نتكلم عن تصريحات منظمه العفو الدوليه خلينا نتعرف بيهم الاول … ونعرف هما مين و منين و هدفهم ايه و بعد كده نشوف تصريحاتهم و اظن هتبقى منطقيه جدا بعد التعريف.
منظمه العفو الدوليه هى منظمه غير حكوميه دى رقم 1 و يقع مقرها فى لندن ( انجلترا) ودى رقم 2 و تركز عملها فى القضايا المتعلقه فى حقوق الانسان و دى رقم 3.
حلو خلينا نشوف بقى التعريف اللى عندنا رقم واحد قال ايه منظمه غير حكوميه و من هنا تعرف ايه ان ليها توجهات سياسيه للتدخل فى شئون الدول من قبل الدوله المنشئه
تانى حاجه ان مقرها فى لندن و طبعا احنا عارفين قد ايه انجلترا بتكره مصر على اعتبار ان مصر هى الدوله اللى انتهت عندها (الامبراطوريه التى لا تغيب عنها الشمس) ف بيبان ده بقى فى تصريحات دلوقتى و منظمات زى العفو الدوليه وغيرها ملهومش اى شغلانه غير انه يطلع يشجب و يدين اى حاجه بتحصل فى الشرق الاوسط.
ثالث حاجه ان عملها متعلق بقضايا حقوق الإنسان طيب خلينا نقف هنا عند الموضوع ده شويه.
حقوق الانسان فى التعريف الحرفى ليها جميع البشر ليها نفس الحقوق بغض النظر عن اللون و العرق و الدين ف هنا محددناش مكان ف مقولناش الشرق الاوسط مثلا.
ليه بقى كل الكلام عن الشرق الاوسط, اقولك علشان ده المخطط يا سيدى الفاضل.
حقوق الإنسان ملهاش مكان معين يعنى مينفعش تقولى ان حقوق الانسان فى مصر و الشرق الاوسط و سايب بلاوى قد كده و جرائم قد كده بتحصل من بلدكم او غيرها وانا اقصد هنا بلد اكبر من بلدكم بس عمرك ما هتقدر تطلع وقتها تشجب و تدين ولا هتقدر تفتح بقك لانك عارف قد ايه انتوا شخصيا انتهكتوا حقوق الانسان و لو هنيجى نعد كده مع بعض يبقى خلينا نشوف حقوق الانسان فى العالم.
اولا منظمه العفو الدوليه مشوفنهاش بتشجب كل قتل المدنيين 5 مليون غزو كوريا 1950
واحتلال فييتنام 4 مليون .. 1955 …غير غزو كوبا 1996… وغزو كمبوديا 1970 …
ومكانش فيه مانع انك تستخدم قنابل دمار شامل ساعه هيروشيما و كل ده ملوش علاقه بحقوق الانسان.
مشوفنهاش 2003 وقت غزو العراق … و 2011 ليبيا هل كل ده مش حقوق الانسان؟!!
وكل ده كوم و والتعامل بميكيالين مع الكيان الصهيونى اللى كل يوم بيقتل الاف من المدنين و الانتهاك اللى بيحصل عينى عينك و انت شايف و عامل مش واخد بالك.
باى حق انت اللى بتقرر ايه هى حقوق الانسان؟! و كمان باى حق تدخل فى شئون غيرك؟! و انت اصلا العنصريه موجوده فى بلدك ….
مشوفناش حد من حقوق الانسان طلع علينا بعد ما شوفنا جورج فلويد بيموت و هوبيترجى شرطى انه مش قادر ياخد نفسه لانه تحت رجل ظابط ابيض ؟!! فين حقوق الانسان وقتها و فين منظمه العفو الدوليه و فين هيومان رايتس ووتش.
ولكن من الاخر كده علشان متتعبش نفسك ان كارت حقوق الانسان ده بيبقى ورقه بعض الدول بتطلعها وقت ما تبقى عايزه تدخل فى شئون دول اخرى و بتنزلها وقت ما بتحب ليه كل ده علشان مصالح الدول الاستراتيجيه لا اكتر ولا اقل !! لكن ملهاش اى علاقه بحقوق الانسان.
