لو عرفت مين هم اعضاء المجلس الثورى المصرى … هتعرف ان هما ليش لهم علاقه ولا بالثوره ولا مصريين من قريب او من بعيد … ايوه زى مابقولك كده لان اعضائه اولا اخوان و رئيس هذا المجلس سيده تحمل الجنسيه البريطانيه والمصريه ايضا اسمها مها عزام … طيب اظن كده الرؤيه وضحت شويه ..ز طيب ازيدك من الشعر بيت مها طالعه انهارده تقول للشعب انزله لان الثوره مستمره !!!
طيب انا هسال سؤال .. هو ممكن يكون بسيط بس معلش لازم اساله … هو فيه ثوره بتقعد 10 سنين مستمره ده ثوره ايه دى … وبعدين انتوا كاخوان ايه علاقتكم بالثوره بس فهمينى علشان انتوا دايما تجيبوا سيره ثوره يناير كانكم اصحابها و انتوا مالكوش اى علاقه بيها … ايوه محتاج افكركم انكم ملكوش اى علاقه بثوره يناير ده مش كده و بس انتوا اللى سرقتوا الثوره .. و ازيدكم من الشعر بيت انتوا كمان كذبتم على الشعب المصرى فاكرين اول ماقلتوا مفيش حد من الاخوان هيترشح ؟ وحصل عكس كده تماما …
ماشى نيجى لنقطه تانيه جايه تقوليلى الحقوا المؤسسه العسكريه مش بتحمى البلد …. حقيقى ضحكتينى لا بجد ضحكتينى … ده على اساس ان انتوا اللى بتحموا البلد مش كده ؟!؟! ناس معاها جنسيات دول تانيه و عايشه فى شقق فارهه و ولا تعرف اى حاجه عن البلد و بتتكلم عن المؤسسه العسكريه … ده مفيش شرف زى شرف العسكريه … بس هنقول ايه ولا لمين … بس انا استوقفنى الجمله ذات نفسها ده مفيش حد حمى البلد دى بعد ربنا زى المؤسسه العسكريه انما انتى عايزه تضحكى على مين … ده ولا حد هيصدقك ولا حد هيديكى اهتمام اصلا عارفه ليه لان الشعب المصرى بيعرف مين نقى و كويس و مين معاه و مين ضده …
عايزك بقى تعملى مؤتمرات و تطلعى فى فيديوهات و وتقولى مهما تقولى بس صدقينى ولا حد هيصدقك
ده انتى و انتى بتقولى الكلام ده انتى نفسك مش مقتنعه بيه …. عايزك تشوفى ردود افعال وشك و انتى بتقولى الكلام ده … وبعدين اصلا لو انتوا فعلا عايزين تاثروا فى الراى العام عمركوا ماكنتوا تقولوا كلام زى ده لان الكلام بتاع ( الثوره مستمره – حقوق الانسان- الخ) مبقاش يجيب مع الناس خلاص … شوفوا كلام تانى و شوفوا حجه تانيه … وحاولوا تغيروا الوشوش لانكم اتحفظتوا خلاص …
طيب عايز اقول حاجه كمان انتوا ما بينكم و مابين نفسكم لما تعملوا كل اللى بتعملوه ده و تصرفوا كم المبالغ الطائله دى …. مش الاحسن انكوا تساعدوا بيها الفقراء … ولا انتوا بتتكلموا بس و حلو اوى الكلام … لكن طبعا مش هتعملوا كده لان عندكوا اجنده و عارفين انتوا عايزين تعملوا ايه و ولا هاممكم الفقراء زى ما بتقولوا …. وانتوا عارفين كده و الشعب عارف كده …
قال ايه المصريين يستحقوا كل خير …. طيب ماحنا عارفين ايه الجديد ؟ و علشان كده فيه منظومه صحيه فى مشروع اسمه التامين الصحى الشامل عمره ما اتعمل فى التاريخ غير دلوقتى … وعلاشن كده ان الناتج الاجمالى المحلى لمصر افضل … وعلشان كده الاحتياط النقد الاجنبى اكبر و كل سنه وبيزيد و علشان كده المشاريع الاسكانيه زى الاسمرات و غيره و غيره موجوده لكل المصريين و علشان كده موجود بنيه تحتيه قويه متمثله فى مستقبل قوى فى مكان العاصمه الاداريه الجديده و علشان كده فيه اكتفاء ذاتى حصل لبعض المحاصيل و زادت التصدير منه و علشان كده فيه مشروعات استزراع سمكى عملاقه بتاثر على السلع الاساسيه للمواطن المصرى و علشان فيه منظومه طرق و نقل اقوى بكتير من اى وقت فات ….
