حمو بيكا وحسن شاكوش ينفيان القبض عليهما:”نروح فين من الصحفيين اللى معندهومش ضمير”

تداولت بعض المواقع الأخبارية وصفحات التواصل الإجتماعي اخبار عن إلقاء القبض على مطربا المهرجانات حمو بيكا وحسن شاكوش من قبل المصنفات الفنية أثناء غنائهما بدون تصاريح وإقامة حفل بالمخالفة لقرارات مجلس الوزراء المتعلقة بشأن جائحة فيروس كورونا “كوفيد 19” بمنطقة المنصورية.

وعلى الفور ظهر حمو بيكا فى مقطع فيديو على صفحته الرسمية على “فيس بوك” نافيًا تلك الشائعات وقائلأً: “سلامو عليكو لكل الناس اللى بيحبونا وكل إخواتى أنا عايز أوصل رسالة لأى جريدة بتكتب كلام كاذب.. أنا فى مكتبى ولسه مخلصين شغلنا فى الاستوديو بتاعى”.

وأضاف بيكا:”بلاش الناس تتكلم كتير علينا وخلى اللى يكرهنا يكرهنا وإحنا مش بنكره حد، أنا طالع فى الفيديو ده أوجه رسالة لأى جريدة بتكدب وبتنزل أخبار علينا مش صحيحة، وأنتو متصدقوهاش”.

وأضاف مطرب المهرجانات: “أنا لقيت خبر بيقول تم القبض على حمو بيكا وعمر كمال وحسن شاكوش ! .. طيب هيقبضوا علينا ليه واحنا قاعدين مش بنأذى حد ومحترمين القانون؟..  بس في جرايد كتير بتكتب حاجات مش بتحصل.. أنا بس بطمنكو علينا”.

كما  ظهر ايضًا  حسن شاكوش فى مقطع فيديو آخر من داخل سيارته عبر حسابه الشخصى على موقع “فيس بوك” وعلق قائلًا: “أنا كنت فى مشوار وشغال بعيد عن المنصورية والهرم، وطالع لايف عشان أعرف الصحافة اللى بتكتب غلط.”.

وأضاف مطرب المهرجانات:” أنا مش عارف هنروح فين من الصحفيين اللى معندهومش ضمير وبيكتبو أي خبر كدب من غير ما يعرفوا إذا كان مصدر الخبر صحيح”.

وتابع حسن :”فى صحفيين محترمة بتراعى ربنا في شعور الناس، لكن الصحفى اللى بينزل خبر وحش عليا أو أي حد تاني عشان تكسب مشاهدات أنت كده مش شغال بحق الله بينك وبين ربنا”.

وأضاف شاكوش، “المفروض كنت هشتغل في حفلة في الهرم وعرفت إن الحكومة لغت كل الحفلات وأنا كنت في حفلة تانيه.. لقيت خبر مكتوب إنه تم القبض على حسن شاكوش وحمو بيكا، وأنا أصلا مروحتش الهرم في شغل خالص، وكان عندى حفلة واتبلغت إنها اتلغت لأمور شخصية، والحفلة كان موجود فيها عمر كمال وحمو بيكا، واتطمنت عليهم وعرفت إنهم تمام ومفيش أي مشاكل”.

يذكر ان أحد المواقع الإخبارية كان قد نشر خبرا يوضح أن المصنفات الفنية ألقت القبض على مطربى المهرجانات حسن شاكوش وحمو بيكا، وذلك أثناء غنائهما بدون تصاريح وإقامة حفلة مخالفة لقرارات مجلس الوزراء المتعلقة بشأن “جائحة كورونا” بمنطقة المنصورية.