قاطع الرئيس عبدالفتاح السيسي، المهندس هشام الشريف، وزير التنمية المحلية، أثناء عرض جهود الحكومة في استعادة أراضي الدولة، وسأله عن مصير 300 ألف فدان ولم يذكرهم في العرض الخاص به.
وقال الرئيس السيسي،: «فيه 1.9 مليون فدان تم حصرهم، وتم استعادة 919 ألف فدان، والمفروض يبقى فيه مليون موقفهم مختلف، وفيه 300 ألف فدان لم يتم ذكرهم، يعني لم يذكروا في الأراضي المطلوب تقنينها، أو استعادتها الدولة، وضعهم ايه؟».
فرد عليه «الشريف»، قائلا: «الـ 300 ألف فدان عليهم مشاكل يا فندم، وجار دراسة تلك المشاكل وعمل تقرير بها».
وأضاف: «عندنا 65 مليون متر أراضي تم الاستيلاء عليها والبناء عليها، وأنا لما بتكلم في النقطة دي بنوضح النقطة دي للشعب المصري وبنقول لما تحركنا التحرك ده، وانفعلنا عليه لم يكن نابعا من غضبة كده، لأن السيد المساعد المهندس إبراهيم محلب شغال في الموضوع ده من سنة، وبيبذل جهد كبير لتقنين الأوضاع لاستعادة أراضي مستولى عليها سواء زراعية أو أراضي بناء، خلال السنة دي».
وأوضح: «من 5 شهور تم تكليف الشرطة والجيش بالمساعدة في استعادة الأراضي ولكن متعملوش حملة إعلامية كبيرة عشان الإجراءات تمشي، ولكن الجهد اللي اتعمل لم يكن كافيا أمام التحدي، عايز أقول للمصريين، فيه ناس بتقولي بلاش تتكلم في الأرقام والأموال لأن الناس بتتصور لما بنقول هنقنن أوضاع 655 مليون متر هناخد أرقام هائلة كأموال، الناس بتبقى خايفة، وإننا بندي للشعب أمال وطموحات مش في محلها، ولكن عايز أقول للمصريين الدولة بقت مسؤولة عن عمل مرافق لـ 65 مليون وهي لم تخطط لذلك».
واستطرد: «الدولة دلوقتي بقى مطلوب مني أدخل على الـ 65 مليون متر، واعملهم مرافق شوارع وبنية أساسية وصرف صحي ومياه شرب وكهرباء وخدمات أخرى ولو قولت أنا محتاج اعمل الكلام ده لـ 65 مليون بنية، يعني عايز 65 مليار جنيه عشان الناس اللي عايشة على الأرض دي، أقدر أوفرلهم شكل مناسب وشكل حياة مناسبة، أنا هعمل ايه في الـ 65 مليون متر، هعملهم مرافق إزاي وأخلى الناس اللي عايشة فيهم شكلهم كويس، وعشان الناس اللي عايشه فيهم ميقولوش الدولة سيباني ليه، ويبقى ناقم على الدولة».
وتابع: «لازم اعترف فيه تجاوزات في الموضوع أثناء تنفيذ التعديات، بسبب الحماس ممكن تضارب وتداخل ممكن، لكن يهمني أوي الناس في مصر والمحافظات تعرف إن الموضوع لم يكن على مستوى المحافظين وقادة الجيش والشرطة بس، ولكن الشباب أيضا مشارك، واللي هيقولي عليه الشباب هنفذه، لأنها مش حاجتي ومش حاجتنا ودي حاجة أولادنا وأولاد أولادنا».
