كل الستات معندهاش سبب واضح و قوي تعرف ليه الراجل بيحب القهوة أكتر من البيت ويقعد فيها بالساعات أكتر من البيت و ليه مابيستمعتش بالقعدة معاها و مع الأولاد و ازاي اصلا بيستمتع بالقعدة على كرسي خشب و القعدة مع رجالة في دوشة و زحمة و دخان و زعيق و خناق لكن اللي كل ست ماتعرفهوش هو إن في 5 أسباب تقريبا بتخلي الراجل يحب القهوة أكتر من البيت عشان كده هنقولهملك:
- ما بيترفضلوش طلب :
أكيد عمرنا ما سمعنا عن راجل قال للقهوجي إنه عايز واحد شاي أو كوباية قهوة و القهوجي رد عليه و قاله قوم إعملها لنفسك عشان أنا تعبان أو قاله أغسل الكوباية اللي شربت فيها، و حتى لو القهوجي تعبان و عنده مواعين كتير عمره ما هيرفضله طلب ولا هيكون في نقاش على الطلب ده يعني لما بيقول للقهوجي واحد شيشة ما بيقلوش كفاية دخان بقى عشان صحتك ، لا طبعا مفيش رغي و لا طول كلام و لا رفض.
- بيتكلم براحته :
استحاله الراجل هيكون بيحكي عن مديرة أو صحابه البصبصين و هيلاقي صاحبه اللي قاعدة معاه على القهوة بيقولوا ما تلاقيك أنت كمان زيه كلكوا صنف واحد، والطينة من العجينة، استحاله يسمعها من صاحبه في حين إنه لما بيقولها في البيت بيسمع ده و أكتر . الراجل على القهوة بيتكلم براحته بيقول كل الألفاظ اللي نفسه فيها لا حد بيقوله بس عشان الولاد و لا عيب كده أنت قاعد في البيت ولا احترم نفسك ، ده مابيخفش يقول إنه زمالكاوي على القهوة في حين إنه ممكن يخاف يقولها في البيت.
- بيتصرف براحته :
مش ممكن راجل يقعد في ركن على القهوة و بعدين يجي القهوجي يقوله قوم من هنا عشان لسه منضف الحته دي ، استحاله القهوجي يتحكم في مكان قاعدتك حتى لو لسه سايبه بيبرق، بالعكس ده هيبقي شايفك بتقشر سوداني و توقع تحتك و عمره ما هيقولك أنا لسه منضف لكن في البيت لو وقع منك فردة شراب هتقوم تجيها غصب عنك، ولا هيتكتب عليك المكان المتوسخ عشان هو لسه منضف.
- بيحس برجولته:
استحاله و انت بتتفرج على أي حاجة عجباك على القهوة هتلاقي صاحبك الراجل بيمسك ريموت التليفزيون ويغير القناة عشان القناة بيتعرض عليها فيلم مذكرات مراهقه أو كليب بوس الواوا و بيحول على القناة اللي جايبه المسلسل التركي، بالعكس الراجل لو بيتفرج على كليب بوس الواوا مع صاحبه، صاحبه هيقوله يا جدع كفايه كده هتاكلها بعنيك فالراجل هيبدأ يحس برجولته لكن لو مع مراته الوضع هيبقي أصعب بكتير و مش لازم نتكلم عنه و ندخل في تفاصيل .
- بيفتكر أيام العزوبية:
بيفتكر أيام العزوبية اللي ملينه بالأكل و الشرب و التهريج و الضحك بصوت عالي و الكلام ده كله بيحصل على القهوة لأن في أغلب الوقت البيت بيبقي خالي من الضحك و الهزار و الفرفشة و ده عشان مراته بتكون تعبانه من شغل البيت أو الأولاد عندهم مذاكرة فلازم البيت يكون هادي لكن القهوة بيكون فيها كسر لكل القيود اللي موجوده في البيت و حصلت بالذات مع الجواز، قبل الجواز كان بيبقي قاعد على القهوة و الساعة تيجي 11 يكلم صحابه هننزل بليل ؟؟ لكن الساعة 11 بتيجي على القهوة بعد الجواز بيتفزع و يقول يا نهار أسود إتأخرت لازم أروح.
المصدر : fawzya
