علق شريف إكرامي، حارس مرمى الفريق الأول لكرة القدم بنادي بيراميدز، على قرار لجنة التظلمات، بشأن أزمة قمة الأهلي والزمالك في الجولة الأولى من مرحلة التتويج بلقب الدوري المصري الممتاز «دوري نايل» هذا الموسم 2024-2025.
ونشر شريف إكرامي، عبر حسابه الشخصي على موقع التواصل الاجتماعي «إكس»: «قرار لا يحتاج خبير ليكشف عواره، ولا اللائحة محتاجة متخصص علشان يوضح ثغراتها، المشهد مكشوف والتجميل ما بقاش ينفع».
وأوضح حارس بيراميدز: «ارتعاش اللوائح وتفصيل القرارات أصبح جزء أصيل من ثقافة المنظومة وسبب أساسي في تدهورها، وعشان نقدر نبني منظومة تحترم نفسها و تتطور، ثبات القرار واستقلالية القواعد من أي عوامل خارجيه هو حجر الأساس».
وتحدث: «ووسط الارتباك ده، بيظهر نوع تاني من الخطر، بيظهر ناس بتقبل الظلم والتدليس لما يكون في مصلحتها وبتجتهد في اختراع مبررات عشان تمحي بيها شعورها بالذنب، وده للأسف بيكشف التناقض بين قيّمهم وأفعالهم».
وأكمل : «بس التبرير عمره ما بيمحي الحقيقة بالعكس ساعات بيعرّيها أكتر خصوصًا لما نكون قدام حالة تدليس واعي ومتعمد، وده أخطر من الكذب، لأنه بيغّلف الباطل بقناع المنطق ويوهمك أن الغلط صح».
وتابع : «وكالعادة، هيتحول الجدل من مناقشة قرار مشوّه لتبادل اتهامات، وتخوين، وتشويه كل صوت مختلف، وكأن المشكلة مش في القرار، لكن في اللي بينتقده، وعموماً الكورة زيها زي الدنيا، قيم الناس الحقيقية بتبان فيها وقت الاختبار».
وأنهى : «في النهايه كامل احترامي لكل من اختار ضميره قبل انتمائه لأن الحق ما بقاش بيتقال مش عشان الناس نسيته، بس عشان بقوا خايفين يدفعوا تمنه».
