أي ست بيت بتقف قدامها حاجات بسيطة، و بتاخد منها مجهود و تكلفة عشان تعملها، لكن في شوية تركات للبيت بسيطة لو عرفتيها و استخدمتيها هتختصر وقت و مجهود كبير، عشان كده هنقولك تركات للبيت و نصايح و هتساعدك :
- عشان تتخلصي من ريحة الزفاره و الزيت في البيت لو بتقلي سمك أو قرنبيط حطي كنكة فيها مياه و خل و سبيها تغلي، هتسحب الريحة .
- لو البوط بتاعك اتني أو كنتي ركناه غلط فاتطبق حطي فيه إزازة بلاسيتك كام يوم.
- عشان تلمعي الذهب اللي فيه فصوص هاتي فرشة سنان ناعمة و معجون سنان و لمعي الخاتم بيه و اشطفيه بعد كده.
- لو عندك أعشاب خضرا مابتستخدميهاش كتير و هتبوظ من عدم الإستخدام، جففيها في الميكروويف أو في الفرن .
- لو مش عايزة تستخدمي زيت كتير انقري إزازة الزيت بالشوكة و انت بتستخدميها بدل ما تشيلي الغطاء خالص .
- و انت بتلمي الهدوم الصيفي فرغي الهواء اللي في الأكياس بالمكنسة عشان الهدوم متعملش ريحة مش حلوة و حطي معاهم صابونة مفتوحة.
- عشان تتدفي كويس سخني رز في الميكروويف و حطيه جوا كيس مخده و حطية على السرير و ده هيكون أحسن من الدفاية .
- لو فرشة الشعر بتاعتك مليانة شعر و عايزة تنضفيها انقعيها في مياة بشامبو 10 دقايق و الشعر هيطلع في إيدك بسهولة .
- عشان البيتزا أو العيش يفضل طري بعد التسخين حطي معاهم في الميكروويف كوباية مياه.
- لو في حاجات بتقع منك كتير في التلاجة و بتعمل فيها بقع، اعملي خلطة في مطبخك عبارة عن مياه و خل و بيكربونات و رجيها و كل ما يقع حاجة في التلاجة رشي منها و امسحي مكان البقعه .
- انقعي الدهب في مياه فيها معلقتين كبار مياه أكسجين و معلقتين خل هيرجع ينضف بسهولة .
- لو الزيت عندك في البيت ولع رشي عليه ملح كتير هيطفي لوحده.
- لو ريحة الميكروويف أو الفرن مش حلوة اقسمي لمونة بالنص و حطيها جواه 30 ثانية .
- لو عايزة تعملي سماد في البيت قشري الفاكهة اللي عندك و حطيها في لخلاط و حطي عليها مياه و اضربيهم مع بعض و حطيهم على الزرع .
- عشان تنضفي مواسير صرف الحوض هاتي أقراص فيتامين سي أو أي فوار مهضم “لو مابتستخدميهماش أو منتهين الصلاحية ” و حطيه في مسورة صرف الحوض و عليه نص كوباية خل مغلية و كوباية مياة مغلية و سبيهم.
المصدر : fawzya
