في حوار له مع الإعلامية أسما إبراهيم في برنامَج “حبر سري”، نفى الفنان أحمد العوضي الشائعات التي تتردد حوله بأنه أصبح مغرورًا بعد الشهرة، ونسي أنه من منطقة شعبية.
وقال العوضي: “أنا كل أسبوع في بيتي القديم في عين شمس، وبفتخر إني من منطقة شعبية. البيت اللي كنت عايش فيه زمان في المنطقه الشعبيه دي أبرك من بيتي اللي أنا عايش فيه دلوقتي. هناك راحة بال و جار بيخبط عليك و جار بيندهك لكن انت النهارده كل واحد في حاله”.
وأضاف: “عمري ما فكرت ترجع تعيش في عين شمس تاني؟ كتير بس مش هينفع لان الحياه اختلفت معايا في شغلي و مكان تصويري بعيد جداً لكن انا قلبي هناك أصلاً”.
وتابع: “هو فيه أحسن من انك تروح للبقال تقوله عايز تمن رومي؟ دي عيشه تانيه و حياه تانيه. الحمد لله انه الواحد بقا عيشته مرتاحه اكتر لكن ولا ربع راحة بال زمان”.
وواصل: “و نسيت اصلي ده لو انا بنكر اني منطقه شعبيه. أنا عمري ما قولت اني من جاردن سيتي. الشعبيات دول هما الاصول و الجدعنه. انا النهارده لو مبقتش احمد العوضي لو رجعت هناك هيشيلوني على كتافهم لكن اللي عايش معاهم دول مش هيعرفوني”.
وأوضح: “انا اصحابي من هناك اصلاً و لحد النهارده صحابي لانه دول اللي كبرت معاهم و ببقا معاهم براحتي انما اللي يعرفني النهارده هو عارفني على وضعي كدا ملهوش دعوه بزمان. اللي انا ساكن معاه في المنطقه الحلوه دي لو كنت انا جيت اكلمه و انا العوضي بتاع زمان بتاع عين شمس كان هيقف يتكلم معايا اصلا؟ لكن دول لأ معايا و بيحبك عشان جواك فانا بنتمني للناس دي”.
وأكد العوضي: “قلبي هناك في عين شمس لانهم حقيقين. الناس اللي هناك دول هما الناس اللي بجد هو بيتكلم معاك وهو مش عارف انت في جيبك كام لكن االي انا معاهم دول بيتكلم معاك على اساس انت في جيبك كام و عربيتك نوعها ايه. فلو هبقا مغرور هبقا مغرور عاللي انا عايش معاهم دول لكن التانين دول انا معاهم ببقا تحت الارض لان ده ميلزمهوش منك غير الكلمه الحلوه”.
