فى اول مره طلع فيها علينا محمد على فى فيديو من فيديوهاته كان مجرد مقاول عنده مشكله و بيقول انه كان ليه فلوس و مخدهاش ده السيناريو اللى هو بيقولوه بس على الرغم من اللى هو بيقولوه ده مطلعش لينا مره واحده اى مستند يثبت صحه كلامه بس مش دى المشكله … اللى يراقب الأحدث مع ترتيب الفيديوهات هيلاقى ان الفيديوهات بتاعته شويه بشويه ابتدت تخش فى الشان العام … من مجرد مقاول بيدور على حقه ده اذا كان ليه حق اصلا و كل كلامه غير موثوق ليا بس بدا من مجرد مقاول بنا … الى مقاول كلام اللى هو انتوا ازاى ساكتين على اللى بيحصل … و شويه بشويه بدا يتكلم فى التعليم و شويه بشويه بدا يحرض الناس علنا على الشغب … طيب اى واحد يشوف الأحداث دى ماشيه ازاى هيفهم ان ده شيء مقصود و مش كده و بس ده هيفهم ان الكلام ده موجه لانه بقى مقصود انه بيهاجم الأداره المصريه علنا بس كل اللى بيقولوه هو الوحيد هو والمغرضين اللى بيدفعولوه فلوس هما بس الى مقتنعين انه ممكن المصرين يقتنعوا بيه .. ليه بقى لان المصريين على الرغم من بساطتهم هم برضه بيفهموا مين شغال لمصلحتهم و مين شغال ضدهم و اظن يا محمد يا على انك بقيت كارت محروق و مصر كلها عارفه كده وانت كمان عارف كده لانك طلعت فى يناير 2020 فى فيجيو بتعتزل فيه السياسه بسبب ان الناس بتحب الأداره المصريه وواثقين فيها
نيجى بقى لمعتز مطر .. حاولت اشوف الراجل ده بيقول ايه يمكن يكون بيقول كلام مختلف اول حاجه لقيتها على صفحه تويتر لقيته كاتب ايه “مؤمن تماما بان اسوأ مكان فى الجحيم محجوز لهؤلاء الذين يبقون على الحياد فى اوقات المعارك الأخلاقيه العظيمه” تمام دى اول حاجه هتشوفها على صفحته اول ما تخش بس الفكره انه بعدها على طول كاتب ايه بقى بيتكلم على ان فيه ناس معتقلين و اول واحده حاطط اسمها “علا القرضاوى” انا مش هتكلم يابنى يا حبيبى طيب حاول تخبى … طيب حاول تعمل انك مش معاهم علشان احاول اصدقك طيب اعمل نفسك مش واخد منهم فلوس مثلا …و بعدين كاتب نقد طبعا على زياره سياده فخامه الرئيس لعزبه الهجانه … يامعتز يا مطر انت اصلا عمرك مانزلت المنطقه دى و متعرفش هى فين و مفيش حد من اى اداره جت على اختلاف العصور نزلت مكان زى ده و شافت مشاكل الناس … لكن برضه انت كده كده هتنتقد اى حاجه هتحصل بس الغريب انك عامل انك مصدق اللى بيحصل وعلشان كده هقولك كلامك ولا ليه اى لازمه موت بغيظك …
بعد كده عندنا واحد اسمه عمرو عادل عمرو عادل ده واحد بيقول على نفسه عضو مكتب سياسى للمجلس الثورى المصرى اللى هو اصلا ولا ثورى ولا نيله بس ما علينا … جاى بقى يكتب لينا من خبراته على تويتر بيقول ايه بقى ان مشروعات الطرق اللى بتحصل دى كلها علشان نفصل الشعب عن المدن الجديده المخصصه للطبقه الحاكمه .. وان الشعب هيشوف قطر فى وسط اراضيه البائسه !!! يا سلام انت بجد بعد الجمله اللى انت قولتها دى عايز اقولك انك كان نفسك اكيد تطلع شاعر او ممثل بس الموضوع منجحش … هل انت بالكلمتين اللى انت قلتهم دول انت كده فاهم سيكولوجيه الشعب المصرى و انت بقى الوحيد اللى واخد بالك من حاجه محدش واخد باله منها غيرك … برافو عليك لا برافو عليك … و بقيت التويتات بقى بيتكلم بيقول ايه انه مش موافق على التطبيع حقك متوافقش بس عايز اسالك سوال انت مين بيقبضك ؟!! طالما انت ثورى كده و برضه موت بغيظك
فيه عندنا بقى واحد اسمه محمد ناصر ده المفروض انه نحات و سيناريست و طلعله كده فى كام دور ثانى فى كام فيلم و كان مذيع فى برنامج فى مصر و كان ليه مشهج مشهور اوى و هو بيشتم فى قطر اه زى مابقولك كده … مره واحده راح تركيا و انضم للقنوات المعارضه .. مفيش مشكله بس بقى ايه تركيا و قطر مره واحده بقوا بلاد جميله و قد ايه لازم نعمل زيهم طيب ارجع اتفرج على نفسك فى الفيديو و على فكره موجود على اليوتيوب .. مش كده و بس عايز اسالك برضه نفس السؤال هو انت مؤهلك ايه علشان تطلع تتكلم فى الشان العام و تطلع تقول للناس ايه الصح و ايه الغلط … الناس على الرغم من بساطتها بتعرف مين بيغشهم و انت لو بتتفرج على حلقاتك عينيك بيطلع منها الحقد و الغل وبرضه هقولك موت بغيظك
وشوش عرفناهم و حفظناهم و كل يوم بيطلعوا يقولوا نفس الكلام .. وهتلاقى ان فيه تضارب بعد ما المفروض كلهم بيدافعوا عن نفس الحاجه و المفروض انهم فى نفس الجبهه …
غاده نجيب …الكلام هنا موجه ليكى.
نفسى اعرف لما بتطلعى كل يوم في فيديو سواء فى القنوات الراعيه للارهاب … او بتطلعى على فيديو لايف على اليوتيوب … و بتقولى نفس الكلام كل يوم و بتعيديه … نفسى اسالك سوال مزهقتيش ؟ يعنى انا حاسس انك اكيد زهقتى من كتر ما هو هو نفس الكلام اللى بتقوليه و بتعيديه كل يوم و مش كده و بس يمكن بتطلعى مع نفس المحاورين اللى كلهم برضه بيقوله نفس الكلام و المحتوى …
بيتهيالى انك زهقتى و اكبر دليل على كده ان المحامى الخاص بحضرتك طلع قال انك طلبتى منه انتى وجوزك انكم عايزين ترجعوا مصر و انه يشوفلكم طريقه علشان ترجعوا مصر …
وش تانى من الوشوش الاخوانيه …الجوكر المصرى
الاخوان بيعملوا نسخه ثانيه من الاشخاص اللى حواليهم بس باسلوب روش شويه ف يجيبولك دكتور علم نفس او هو مسمى نفسه دكتور ومعالج نفسى علشان يكسبوا شعبيه اكثر على الارض لانه مش شبهم ولا الاستيل بتاعهم بس برضه بيقول نفس الكلام اياه و نفس الاسطوانه المشروخه اللى هى الشرعيه اللى هى انتهت بنهايه 30 يونيو بس ما علينا مش موضوعنا دلوقتى … جاى بقى بيعمل فيديوهات قال ايه اسمها فيديوهات توعيه سياسيه … فيديوهات ساخره … لا بجد بهرتنى … ياخى روح وعى الناس اللى بتشتغل معاهم سياسيا … حقيقى المستوى اللى وصلتوا ليه هو مستوى الانحدار انتوا مش مدركين انتوا بقيتوا بتعملوا ايه … و انصحك تتفرج على فيديوهاتك بعد ما تخلصها.
على سبيل المثال انه عمرو عبد الهادى هو سياسى طالع علينا و يدينا من فتاويه فى الاراء السياسيه … لاء و ايه كاتب فى صفحته على السوشيال ميديا انه غير مسئول عن صحه الخبر و لكنه مسئول فقط عن تحليله … يعنى انا عايز اسالك لما انت غير مسئول عن صحه الخبر طالع كل شويه تنتقد و تقولنا فى اخبار انت متعرفش صحتها ليه ؟!! دى حاجه غريبه اوى ولا الادهى من كده انه كاتب ده علنا وصراحه على صفحته الشخصيه يعنى مثلا مش مكسوف ….. طيب دى اول حاجه تانى حاجه انك جاى تنتقد و تقول كل حاجه بيعملها النظام انها حاجه مش كويسه للشعب … طيب قولى انت عملت ايه ؟! او النظام اللى انت بتسانده عمل ايه دى تانى حاجه .. طيب ياترى ثالث حاجه ايه هى انه جاى يقول على المونوريل انه مشروع الاداره المصريه بتضحك فيه على الشعب على اساس ايه بقى ؟! اسمع التحليل الخاص ب السياسى اللى المفروض هو بيحلل الخبر … ايه بقى انه المونوريل هيخلى المسافه من العاشر للقاهره يبقى 45 دقيقه هو بقى بيقول ان من العاشر من رمضان الى القاهره نصف ساعه …. ياسلام بجد على تحليلاتك الرائعه طيب ماهو يا محلل يا سياسى لو كان الموضوع كده مكانش هيبقى ليه لازمه المونوريل بس انت علشان مش عارف تقول ايه و معندكش حاجه تقولها طالع بتقول اى حاجه و عايز اقولك ان المسافه بتاخد وقت اكتر من كده بكتير ده انت لو فى العاشر و بتحسبها لوسط البلد اللى هى رمسيس بقعد على الاقل ساعه و لو من العاشر من رمضان ل 6 اكتوبر بتاخد حوالى ساعتين ونص كمان !!!! … لكن هقول لمين انت ولا عايش معانا ولا تعرف عننا اى حاجه ولكن بتتكلم و خلاص …. و من اكثر الحاجات المضحكه فى الناس اللى بيساندوا الاخوان دول ان ربنا بيوقعهم فى بعض يعنى هو هو عمرو عبد الهادى ده طلع فى فيديو بيتكلم على الناس زمايله اللى فى القنوات اللى بيقبضوا كتير و بيتصرف عليهم ملايين !! ايوه زى مابقولك كده ده هو اللى قال و ممكن تشوف الفيديو على اليوتيوب و طالع بيقول ان الستاند اللى ماسك بيه الموبايل تمنه حاجه بسيطه و قال ايه ان فيه ناس منهم بيلبسوا هدوم مستعمله فى حين ان فيه زمايل ليهم بيتصرف عليهم فلوس كتير اوى …
طيب مستنينى اصدقك بعد كل ده !!!
نيجى بقى لوليد شرابى ده واحد و مش هقول على منصبه اللى كان بيشغله هنا فى مصر لان منصبه المفروض يكون ارقى من اللى هو بيعمله ده (المفروض انه المتحدث باسم قضاه من اجل مصر) والمفروض ان سمعه القضاه دى اشرف و انزه من اللى هو بيعمله الصراحه ولاتمت ليه بصله و مش كده و بس … وليد شرابى ده المدير الاقليمى لمنظمه هيومان رايتس مونيتورمنظمه موجه لحقوق الانسان وطبعا احنا عارفين ان حقوق الانسان دلوقتى هو كارت الدول الخارجيه بتستخدمه للتدخل فى شئون الدول الاخرى وخصوصا التوقيت اللى احنا فيه ده … مع العلم ان فيه اختراقات فى حقوق الانسان من جانب الكيان الصهيونى بس ولا كان فى اى حاجه بتحصل مسمعناش وليد شرابى بيقول حاجه على اللى بيحصل هناك او فى سوريا بس ماشى ماهو ده المتوقع و معروف انت موجود فى المنظمه دى ليه و هدفك ايه منها …
نيجى بقى لسليم عزوز و هو صحفى مناهض للحكومه المصريه و الاداره المصريه بشكل عام و مش فى حاجه واحده لا … ده بينتقض كل حاجه طيب خش كده اتفرج على الفيديوهات بتاعه سليم عزوز فى الجزيره جايبين مظاهرات فى الجزيره و بيقولك فى حراك فى الشارع المصرى و المظاهرات موجوده فى المحافظات و الشوارع والازقه و اللى بيتظاهروا دول المئات من نبوع مصر !!! و لو استمر الوضع هيبقى الاف موجودين فى الشارع بيتظاهروا …. انا هرد عليك هقولك اسطوانه مشروخه شوفلك غيرها … من غير ما اقول ولا كلمه زياده …. ولا هضيع وقتى فى كلام اتهرس مليون مره.
صلاح بديوى بقى هو كاتب و صحفى بس برضه تابع للجزيره القطريه و تابع للاخوان بس بقى بينتقد الحكومه المصريه من وجهه نظر تانيه بقى … يعنى الاخوان بيعملوا ايه يجى واحد زى سليم عزوز يقولك فيه مظاهرات ضد الحكومه …. يجى مثلا واحد تانى زى عمرو عبد الهادى ينتقد المشروعات القوميه ويجيلنا بقى صلاح بديوى يقولك ايه بقى ينتقد من وجهه نظر تانيه … يقولك بقى ايه ان الاداره المصريه هى عميله للصهاينه … والله ده كلام يضحك …. انتوا لعبتكوا مفقوسه اوى ان كل صحفى ولا كاتب بينتقد فى حاجه شكل و بينتقد من جهه مختلفه علشان تكسبوا اكبر قدر من الشارع المصرى … واحد ينتقد المشروعات القوميه واحد تانى يقولك حقوق انسان واحد ثالث يقولك فى حراك فى الشراع المصرى وانت تقول الاداره المصريه بتكسب من الصهاينه … يابنى انت مدرك انت بتقول ايه ده اللى انت بتقولوه ده ميقولوش عيل فى سنه تانيه ابتدائى … بس لعبتكم مفقوسه اوى و باينه اوى و محدش هيصدقها و اكبر دليل على كده ان نسب المشاهده بتاعتكم مش بتاثر فى راى الشارع المصرى وهو ده اللى هيجننكم لانكم بيتصرفوا ملايين ومفيش اى حاجه بتحصل و عماليين تصرفوا ملايين و برضه الوضع هو هو … عارف ليه لان نيتكم سوده و مفضوحه و معندكوش غير الاسطوانه المشروخه اللى دايما تقولوها …
اخر حاجه يا صلاح يا بديوى عايز اقولهالك ان انتوا اللى اتعاملتوا مع الصهاينه وقت الثوره والبلد كلها عارفه كده و مش انا اللى بقول كده ده ايميلات هيلارى كلينتون هى اللى بتقول كده … يعنى الناس اللى اتعاملتوا معاهم هما اللى باعوكم .. وانتوا اللى اتعاملتوا مع الصهاينه و مش كده وبس ده معندكوش مشكله تتعاملوا معاهم تانى و كمان على حسب رؤيتى لسه هتتعاملوا معاهم ثالث.
