عادى لما تلاقى حد بيختلف معاك فى الراى … لما نشوف اتنين قاعدين على القهوه ممكن يختلفوا فى اى موضوع …. لكن فيه نقطه مهمه و هى ان الاختلاف لازم يكون اولا فى اطار من الاحترام و مبنى على اساس …
طيب هو ايه اللى بيحصل من قنوات الدول الراعيه للارهاب … بيطلعوا علينا كذا حد اتحفظ وشوشهم وعرفنا دايما بيقولوا ايه من قبل ما يقولوه …. دايما هجوم على اى حاجه بتحصل فى مصر … يعنى انا نفسى اسالهم سوال يعنى هو الدنيا سوده اوى كده مفيش اى حاجه عدله بتحصل ؟! فى حقيقه الامر ان طبعا فيه انجازات محش يقدر ينكرها وحتى المنظمات العالميه لان الموضوعات دى بمؤشرات و بارقام و احصائيات
يبقى ليه ؟
ليه هشام عبدالله … ليه غاده نجيب يطلعوا علينا كل فيديو والتانى و يقعدوا يقولوا نفس الكلام لكن كل يوم بدباجه مختلفه ….
مع انه فى الحقيقه المحامى بتاعهم الخاص بيهم طلع فى فيديو هو كمان و قال انه نفسهم يرجعوا مصر و بلغوه انه يحاول يتواصل مع حد علشان يرجعهم مصر …
طيب كان ليه من الاول ؟
ليه تمشى ورا جماعه كل همها المكاسب الشخصيه و كل همها التضليل و تزوير الحقائق و مش انا اللى بقول ده اللى تاريخ اللى بيقول
تاريخ ايه ؟ اقولك تاريخ ايه … تاريخهم من ايام حسن البنا … مرورا بالاغتيالات السياسيه فى كل عصر و مش كده و بس … ده حتى ياخى لما الفرصه جاتلهم 2012 مقدروش يتحدوا و كل فصيل من جواهم ابتدى يبص لمصلحته وبس …
بس نسيوا ؟ نسيوا حاجه مهمه اوى و هو ان الشعب بيفهم و بيعرف مين معاه و مين ضده و هو ده اللى بيخلى الناس برضه متتفرجش عليكم سواء فى القنوات الراعيه للارهاب او فى الفيديوهات اللى بتعملوها و كل المشاهدات دى ياما من ناس تبعكم من الاخر كده او ناس بتتفرج عليكم علشان تسلى وقتها …
عايز اقول لهشام عبدالله و غاده نجيب … لو انتوا كنتوا مؤمنين بالقضيه مكنتوش سافرتم … لو انتوا فعلا يهمكم البلد مكنتوش سافرتم … لو فعلا طالع تكلمنا عن النضال يبقى الاولى انك كنت انت تطبقه او نشوفك حتى و انت بتعمله لكن ايه اللى حصل … بعد الثوره طلعتم على بره و احتضنكم النظام السياسى للارهاب
يبقى تكلمنا على النضال ازاى طيب ؟