قال الرئيس عبد الفتاح السيسى، إن الفكرة فى محاولة إسقاط الدول من خلال حشد الرأى العام بالسلب من خلال التشكيك والكذب والافتراء، قائلا: “ده كلام أنا بقولوا دلوقتى لمهام تضاف للجيش والشرطة مع أبناء مصر المجندين سواء فى الجيش أو الشرطة.. من فضلكم لابد من التوعية.. ولازم نبقى فاهمين كويس التوعية.. وقلنا الكلام ده من 7 سنين أن الكليات العسكرية يجب أن تدرس يعنى ايه دولة وكيفية الحفاظ عليها والمخاطر التى تقابلها”.
وأضاف الرئيس السيسى، خلال كلمته فى حفل تخرج عدد من الكليات والمعاهد العسكرية: “موضوع الوعى موضوع مهم وخطير، وهى مهمة تضاف لما تبذلوه وهو بناء وعى حقيقى لأخوك المجند اللى جاى يقعد معاك سنة أو أكتر عشان هو كمان يساهم بوعيه مع أسرته، مفيش تحدى يقابل بلدنا والبلاد المستهدفة بأجيال الحرب الحديثة إلا بمقابلتها بوعى حقيقى، وبكرر الكلام ده كتير وليه الإلحاح فى الإشارة للخطر ده، لأنه لا يقل خطر عن أى معتدى يمكن أن ينال من الدولة أو يعتدى عليها لأن الهدف والقضية كلها إزاى يحركوا الشعوب لإيذاء بلدهم، وكل القضايا والمشاكل فى الدول لا تنتهى لأنها سنن الدنيا مفيش مطلق دولة كاملة، لكن الفكرة إزاى أحشد الرأى العام بالسلب من خلال التشكيك”.
وتابع الرئيس موجهًا كلمته لخريجى الكليات العسكرية:”إن المهمة التى تدربتم من أجلها حتى تقوموا بتنفيذها هى من أشرف المهام”.
واستكمل الرئيس:”مهمة حماية وطن وترابه وحماية أهله وناسه أمر شريف وعظيم قوى”، مضيفا: “الحقيقة الذى يقدم من أجل حمايته هى الروح والدم، مبيتقدمش جهد وعرق وسهر بس، لأ، ده بيتقدم روح ودم وأعتقد إن الحياة أغلى ما يمتلكه الإنسان”.
