قام محمود سليمان، صاحب “فيديو التحرش” في التجمع، بالدفاع عن نفسه، قائلا: “أنا حد له وضعه الاجتماعي ووضعه المهني، وأنا نائب رئيس مجلس إدارة في شركة كبيرة مش حد قليل، وأنا مش بفتح شباك عربيتي عشان ارمي كلمة لحد، مش أنا اللي أعمل كده بوضعي ده”.
وأضاف محمود، في مداخلة هاتفية مع الإعلامي وائل الإبراشي في برنامجه “العاشرة مساء”، المذاع عبر فضائية “دريم”: “أنا لما نزلت أكلمها أسلوبي معاها يثبت أنا بني آدم همجي ولا لأ، وأنا مغلطتش بكلمة معاها”.
وتابع: “ده مش تحرش ولو تحرش اتكلم عن الشخص التاني، واللي اتمسح معرفش اتمسح ليه، يمكن عشان مش عجب الناس، والفيديو بتاعي اللي عجب الناس، وبقوا بينزلوا عليه كوميكس، والموضوع زاد عن حده كتير قوي، أنت مش متخيل الموضوع بقا عامل إزاي”.
وتابع: “أنا مش متحرش خالص وأنا اتعملي فيديو على (فيس بوك)، وفجأة لقيت مصر كلها بتكلمني”.
وأوضح الشاب أنه يعمل كمهندس ويسافر للخارج كثيرًا، ويقيم في الجونة، متابعا: “أنا لقيت بنت شكلها بنت ناس وشكلها محترم مش لابسة لبس ملفت خالص، وكانت شيك مش ملفتة، ومش لابسة حاجة أوفر، وأنا صاحب الموقف، والبنت كانت واقفة على رصيف (أون ذا ران)، واعتقدت يعني لما اقولها نشرب (كوفي) هي هتركب معايا عربيتي، ونروح، وهي لو لفت وشها كانت هتبقا جوة”.
وأضاف: “أنا الموضوع مش مضايقني خالص، وأنا النهاردة فيه 5000 بني آدم عايز يشرب معايا نفس كوباية القهوة دي”.
واستطرد: في فيديو آخر” أنا كنت بهرج وبضحك وأنا مأجرمتش لما بقول لحد تعالى نشرب قهوة، أنا ممكن أكون أخطأت آه لكن مأجرمتش، عشان يحصل لي ده كله، وأنا بيتعمل لي شو معرفش عشان إيه”، متابعا: “تحرش دي كلمة كبيرة قوي، ومتتقالش على واحد زيي أنا، وأنا منزلتش قليت أدبي.. أنا نزلت عشان الموضوع يبقى فيه ذوق وأدب”.
واستكمل: “مينفعش وأنا كده تسوء سمعتي وسمعة عيلتي، وأنا حد من عيلة كبيرة مش من عيلة صغيرة، وأنا عندي شغلي وممكن كلمة عاكستها آه لكن تحرش لأ، أنا مش مذنب لأن مفيش تحرش لفظي!”.
ورفض الشاب الاعتذار للمجتمع، قائلًا: “لا مش هعتذر للمجتمع اعتذر للمجتمع ليه؟”.
