توالت مشكلات طالبات المدينة الجامعية بجامعة الأزهر ، في قطع المياة عن المدينة الجامعية وعدم تقديم طعام جيد، و المعاملة سيئة للغاية من جميع المسئولين بداية من الدكاترة، الي الامن والمشرفات في المدينة الجامعة.
وعندما تشتكي طالبة من سوء المعاملة يرد عليها ” إحنا لميناكم من الشوارع” ، وكأن المدينة الجامعة تخص اشخاص بعينهم وليست ملك مؤسسة محترمة في البلد.
بدأت المشكلة بفتاة كانت تبكي خارج المدينة الجامعة لرفض الامن دخول طعام من الخارج وساعدتها احدي الفتيات في تهريبه وكأنهما يهربان نوع من المخدرات او الممنوعات.
ولم تجد الطالبات سوي مواقع التواصل لتفعيل المشكلات وتوصيلها الي المسئولين حيث نشروا علي صفحات الفيس بوك التالي ..
انهاردة وأنا جاية من الراوند لقيت بنت بتعيط أدام المدينة بقولها مالك بتعيطي ليه قالتلي إنها جايبة أكل من البيت ومش راضيين يدخلوه والأمن زعقلها وكلمها بطريقة وحشة .. خدتها وحدفنا الأكل من ع السور -زي الحرامية- ودخلنا جبناه .. شكلها وهي فرحانة بدخول الأكل كأنها دخلت الجنة!
-امبارح بعد الفطار البنات كانو واقفين في البلكونات بتاعة مبني أ وعمالين يصوتو .. والله فعلًا صوتهم كان يقطع القلب وهما بيقولو عايزين ميا عايزين ميا ..
المياة ال هي أقل حقوق أي كائن حي حتي لو حيوان!
المياة قاطعة عندهم من الفطار للسحور وبتيجي بعد الفجر! وسبحان الله موجودة عند المشرفات! ازاي دا!
البنات كانو بيجرو في المدينة بشعرهم وبلبس البيت عشان يلحقو يشربو من أي مبني قبل الفجر ما يأذن ..
-امبارح رئيس الجامعة طلع قرار إن مفيش خروج من المدينة بعد الساعة 4:30 العصر حتي لو هنشتري ميا من أدام المدينة!
يعني مفيش أي أكل بيدخل من برا ولا حتي راضيين يخلونا نخرج ناكل برا .. يعني أنا مثلا لو عايزة أخرج أفطر برا المفروض أخرج من العصر في الجو الحار دا ؟!! طيب دخلولنا الأكل طيب! حسنوا الأكل بتاعكم طيب عشان نعرف ناكله .. والله هما نفسهم ميرضوش ياكلو من الأكل دا .. أنا عن نفسي لقيت فيه شعر وبنات تانية لقو فيه صرصار ..
طيب احنا دلوقتي نفطر ايه ولا ناكل ازاي ؟! وللأسف مضطرين اننا نقعد لأن عندنا راوندات والناس التانية عندها امتحانات
وكل ما نيجي نشتكي لحد من المسؤولين يقولو ال مش عاجبه المدينة يسيبها .. كأنهم بيتفضلو علينا وكأننا بنشحت منهم
احنا مش متغربين وجايين من بيوت أهالينا عشان نشوف البهدلة والذل دا!
ولو سبنا المدينة ورحنا سكن برا هنتبهدل من السماسرة واستغلالهم لينا ..
كل سنة المدينة بتسوء عن السنة ال قبلها بس الوضع دلوقتي لا يُطاق بمعني الكلمة ..
احنا مش عارفين نروح فين ولا نشتكي لمين .. مفيش أي حد بيسمع لينا .. مفيش علي لسانهم إلا (مش عاجبكم سيبوها)
1- الأكل بيدخل بس بياخدوا الكارنيه ويسجلوا بياناتك،، انتي لك الحق تجيبي اي اكل ولكي حق بوناتك من المدينه في عيش في البونات هتاخديه او زبادي ومعلبات ولا ايه،، كفايه سرقه ونهب بقي البونات دي بتروح للموظفين علي الملأ والعمال والأمن اللي عمال يقطع فينا ويشتمنا..
2-يعني ايه الاستاذه الفاضله تقول لسواق العربيه بالحرف الواحد دوس عليهم وادخل علشان واقفين يحتجوا عاوزين يخرجوا يجيبوا مياه واكل،، ازاي تقول انتو كلاب واحنا لميناكم من الشارع،، ازاي لسه موجوده ومااتحولتش للتحقيق من 48 ساعه وتقولوا المشكله اتحلت
3-ازاي مديره أمن فالكون تمسك الطالبه من دراعها وناخد منها الموبايل غصبا وتمسح الفيديو اللي مصوراه،، ليه هو في حاجه غلط بعد الشر مش كله من أوامر رئيس الجامعه والمديره بتاع المدينه.. وبتقولوا المشكله اتحلت
4-ازاي مديره الإسكان بتقولهم بكره نقفلها ونرميكم في الشارع هو احنا كنا قاعدين في بيوتكم واحنا مش واخدين بالنا
احنا قاعدين بفضل الله بتقديراتنا وفلوسنا برده، ،أقل بنت بتكون جايبه جيد جداً،، ولسه بتقولوا المشكله اتحلت
5-ازاي المشرفات في كل المباني بلا استثناء عمالين يرددوا كلام ا. هدي فوزي بأننا كلاب وهم لمونا من الشارع وتقولوا لي المشكله اتحلت
6-الكولديرات ماليه مصر وشوارعها صدقه جاريه واحنا بيفصلوها علينا في المدينه بس بتاع الأمن شغال واللي عند حسين شغال والتلاجات عند المشرفات شغاله،، ومش مكفيهم لا بيقطعوا الميه العاديه، ،ومكفاهم ظلم شغلوا المايه السخنه علي الناس في الحر اللي بنبقي هانموت عليها في الشتاء علشان ناخد شاور
وبتقولوا المشكله اتحلت..
7-رئيس الجامعه محمد المحصراوي بالحرف الواحد “اللي مش عاجبه المدينه يمشي يسكن بره،، وبلاش الإعلان والصحافة وتعملوا شوشره لنفسكم” تهديد عيني عينك وتقولوا لي اتحلت المشكله،،،
مشكله ايه اللي اتحلت الناس اللي بتطبل لرئيس الجامعه يسكتوا شويه ويوفروا كلامهم لنفسهم ويروحوا يقعدوا علي السفره جنب عيالهم واهاليهم فيها من كل حاجه وسيبوا الناس هناك عيشتها متدكره،، مش هاتساعدوهم يبقي تسكتوا احسن
البنات دي بتذاكر ياما بتحضر راوندات،، احنا مش عايشين في بلد ابو لهب وابو جهل علشان عذاب الكفار اللي بنشوفه ده.
الدكاتره بتوع الجامعه اللي بيتكلموا عن حقوقنا وعاملين نفسهم ب يدافعوا عننا هم أول ناس شغاله عصافير لرئيس الجامعه علشان مناصبهم،، في حين لو التكييف عطل في مكتب حد منهم الدنيا تقوم من مكانها وتقعد لحد مايتصلح،، اسكتوا احسن..
https://www.facebook.com/amira.darwish.97/videos/2173491076214634/?t=0
