أعلن الإعلامي عمرو أديب، عن استيائه من حكم القضاء الإداري بوقف تراخيص «أوبر وكريم» في مصر، قائلًا: «الشركتان كانوا رحمة لينا ومظهرا حضاريا وفاتحين بيوت.. ليه الذل.. أنتوا بتسهلوا حياة الناس ولا تنكدوا عليهم».
وأضاف أديب، خلال برنامج «كل يوم»، المذاع على قناة «أون إي»: «لما ربنا يكرمنا ويفتح علينا في البلد بحاجة تريحنا وتريح عيالنا وزوجاتنا وأهلنا ليه ننكد على نفسنا.
يعني البهدلة اللي إحنا اتبهدلناها في التاكسي الأبيض من تاكسي متهالك وسائقين بيفاصلوا في الأجرة ولا يقفوا في الشارع هترجع تاني.. لو حد أمه تعبانة يجيبلها أوبر لحد باب البيت.
كنا بنبقى مطمئنين على عيالنا وهما رايحين الدرس ونفضل نكلم السواق ولو حد راجع بالليل متأخر يقدر يركب أوبر ليه العالم كله يتقدم وإحنا بنتأخر».
وأشار إلى أن هناك ترخيص من مجلس الوزراء على عمل الشركتين والآن يتم توقيفهم.
