تحدثت الروسية جوهرة، عن عشقها للرقص الشرقي منذ أن كان عمرها 15 سنة، قائلة: «الرقص أكبر حب في حياتي، أمارسه منذ أن كان عمري 3 سنوات، لكني انتقلت للرقص الشرقي وعمري 15 سنة، وعمري الآن 30 سنة، يعني بقالي 15 سنة أرقص شرقي، أنا بحبه».
وأضافت في حوار مع الإعلامي وائل الإبراشي على قناة «دريم»: «تعلمت الرقص الشرقي بنفسي، اتفرجت على راقصات من مصر وأوروبا والأرجنتين، لأن الرقص الشرقي يمارسه كثيرين، لكن في مصر أول راقصة اتفرجت عليها كانت فيفي عبده».
عبرت جوهرة، عن حبها لمهنة الرقص، بقولها: «أنا بحب الرقص، إحنا مانقدرش نعمل حاجة بدون الحب، أما الفلوس بنكسبها من أي حاجة مش شرط نكون بنحبها، وأنا بكره أعمل حاجة مش بحبها، وبالتالي الفلوس مش كل حاجة، الرقص حبي وعشقي، وعشان كده جيت هنا، أنا سيبت جوزي وأهلي في روسيا وجيت القاهرة عشان أرقص وأحسن مهاراتي فيه».
كله متغطي
روت الراقصة الروسية، ملابسات القبض عليها من قبل الأجهزة الأمنية، بقولها: «تفاجأت بقرار القبض عليا، والموضوع ده أذاني جدًا، وناس كتير قالوا ليا إن ده عادي، عمر ما فكرت إن ده هيحصل».
وأضافت: «كنت برقص في كبارية، وألقي القبض عليا فيه، أنا مش فاهمة الأسباب اللي أدت للقبض عليا، أنا روحت الشرطة، وبعد كده مكان تاني عشان التحقيقات، وكل مكان بيحقق معايا في حاجة مختلفة تماما، البعض بيتكلم عن المستندات وآخرين بيتكلموا عن البدلة، ولحد دلوقتي مش عارفة إيه السبب الحقيقي اللي أدى لده، بس أنا عارفة إن فيه سبب آخر للقبض عليا بس أنا مش فاهماه، وأعتقد إنه لازم يمر شوية وقت عشان أفهم إيه السبب الحقيقي».
ونفت جوهرة ما نشر عن عدم ارتدائها «شورت»، قائلة: «مصمم الأزياء اللي عمل البدلة قال أنها بشورت، البدلة مافيهاش مشكلة ومطابقة للمواصفات، أنا حبيت أن الشورت ما يكونش ظاهر أوي، وحصلت المشكلة عشان الناس ما خدتش بالها إني لابسه شورت، أنا كنت لبساه وكل حاجة فيا كانت متغطية».
